OpenAI canlı yayımda Sora video hazırlama modelinin artıq tədqiqat mərhələsindən çıxaraq “sora.com” üzərindən istifadəyə açıldığını elan edib. Fevral ayında ilkin versiyası təqdim olunan Sora modeli, süni intellektlə realistik videolar hazırlamaq potensialını nümayiş etdirmişdi. İndi isə bu modelin daha inkişaf etmiş versiyası olan Sora Turbo istifadəyə verildi. Yeni versiya daha sürətli işləmə qabiliyyəti və inkişaf etmiş funksiyaları ilə seçilir. İstifadəçilər sora.com vasitəsilə mətn daxil etməklə 1080p keyfiyyətində və 20 saniyəyə qədər videolar hazırlaya bilərlər. Sora, ChatGPT Plus istifadəçiləri üçün pulsuz təqdim edilir. Bu plan, ayda 480p keyfiyyətində 50 video hazırlamaq hüququ verir. Daha yüksək keyfiyyət və əlavə funksiyalar istəyənlər üçün isə ChatGPT Pro planı 10 dəfə daha çox istifadə hüququ və 720p-dən yüksək keyfiyyət təklif edir. Xüsusi qiymət paketlərinin isə gələn ilin əvvəlində tətbiq edilməsi planlaşdırılır.